Урматтуу конференциянын катышуучулары!

Мамлекеттик жана коомдук ишмер, өлкөнүн укук тартибинин негиздөөчүлөрүнүн бири, милициянын генерал-майору Эргеш Алиевдин 120 жылдыгына арналган бул маанилүү илимий иш-чараны өткөргөнү үчүн уюштуруучуларга чын жүрөктөн ыраазычылык билдирем.

Кыргызстан үчүн Эргеш Алиевдин ысымы — бул улуттук ички иштер системасынын калыптануу доорунун символу, өзүн элге кызмат кылууга арнаган адамдын кесипкөйлүгүнүн, эрдиктин жана моралдык күчтүн символу.

Анын өмүр жолу – инсан өзүнө кайраттуулукту, терең билимди жана чыныгы тарыхый жоопкерчиликти бириктирүүгө жөндөмдүү экендигинин ачык мисалы.

Эргеш Алиев өзүнүн кызматын кыргыз милициясынын пайдубалы түптөлүп жаткан согуштан кийинки алгачкы жылдары баштаган жана дээрлик кырк жылдай өмүрүн мыйзамдуулукту, коомдук тартипти жана укук тартибин бекемдөөгө арнаган. Жооптуу кызматтарда иштеп, ал ички иштер органдарынын ишин уюштурууга олуттуу салым кошкон, республиканын ар кайсы облустарында милиция башкармалыктарын жетектеген, кадрларды даярдоого, жаш кызматкерлерди тартип, мыйзамдуулук жана кызматтык             ар-намыстын деминде тарбиялоого өзгөчө көңүл бурган.

Ал өз мезгилинин өкүлү гана эмес, андан да алдыда болгон. Анын ишмердүүлүгү ички иштер органдарынын кызматкерлеринин бүтүндөй мууну үчүн мектепке айланган, алар үчүн Ата Мекенге кызмат кылуу ыйык милдет болгон жана ошол бойдон калууда.

Бүгүн, Эргеш Алиевдин туулган күнүнүн 120 жылдыгын белгилеп жатып, биз кайрадан тарых сабагына кайрылабыз. Анткени мындай инсандар жөнүндө сөз кылбай туруп, мамлекет жана коом алдында өз жоопкерчилигин сезген чыныгы профессионалдарды тарбиялоо мүмкүн эмес.

Аталган конференция өзгөчө мааниге ээ, ал илимдин өкүлдөрүн, практикада иштегендерди жана изилдөөчүлөрдү бириктирип, улуу инсанга урмат көрсөтүү менен бирге, Эргеш Алиевдин руханий жана интеллектуалдык мурасын — укуктук мамлекеттин заманбап өнүгүү контекстинде түшүнүүгө мүмкүнчүлүк берет.

Анын элеси юристтердин, окумуштуулардын жана офицерлердин жаңы муундарын абийирдүү жана Ата Мекенге берилгендик менен кызмат кылууга шыктандырат. Анткени, тарых көрсөткөндөй, мамлекеттин чыныгы күчү өз элинде, алардын билиминде, абийиринде жана ишине болгон мамилесинде.